Фил 4.2-9

Итгэлийн ахан дүүсийн дунд заримдаа асуудал гардаг. Бүр хамтдаа Бурханы төлөө мөр зэрэгцэн үйлчилж байсан нөхдийн дунд ч энэ асуудал гарч болох юм. Энэ үед яах ёстой юм бэ? Бие биенээ муулаад, хов жив цуу яриа тараагаад явах уу? Яаж шийдэх нь зохистой вэ?

2-4 Биднийг юу нэгтгэж байна гэдгээ хар.

Адилхан Христэд итгэгч хоёр эмэгтэйг (Юодиа, Сунтухе) санал зөрчилдөөнөө арилгаж, бие биенээ ойлгож, зөвшилцөлд хүрээч гэж Паул хэлж байна. Тэд Филиппойн чуулганд нөлөө бүхий эмэгтэйчүүд байсан байж болох юм. Харин энэ хоёр эмэгтэйн санал зөрөлдөж байсан зүйл нь тэд нарыг хоёр тийш болгох биш, харин эвлэрч болох асуудал байсан гэдэг нь эндээс ойлгомжтой байна. Хэрэв асуудал нь тэдний итгэл, Бурхан, Христтэй буюу амин чухал асуудал байсан бол тэр асуудлынх нь учир начирыг Паул дэлгэрэнгүй тайлбарлах байсан. Паулын олон захидлаас тийм жишээг харж болно. Хуурамч сургаал номлогчдын юу нь буруу вэ гэж Паул олонтаа тайлбарласан байдаг. Паул энэ хоёр эмэгтэйн хэн нэгнийг нь зөвтгөөгүй, харин хоёуланд нь хандан гуйж байна.

Энэ хоёр эмэгтэй яагаад зөвшилцөлд хүрэх ёстой вэ? Яагаад гэвэл:

-       Хоёулаа адилхан Сайн мэдээний төлөө хамтран зүтгэгчид

-       Нэг зорилгын төлөө зүтгэгчид

-       Амийн номонд нэрс маань адилхан бичигдсэн

-       Христийн дотор ахан дүүс болсон

-        Нэг Эзэнтэй болсон хүмүүс

“Эзэн дотор баярла.” Хамгийн гол нь “Эзэн дотор” баярлах буюу Христ миний гэм нүглийг уучилж, тэр нүглийн хүлээс, шийтгэл, буруутгал, ачаа дарамтаас чөлөөлөгдсөнөө санаж баярлах юм. Бидний нөхцөл байдал ямар байхаас үл хамааран Христийг мэдэхийн давуу тал, гэм нүглийн шийтгэлээс чөлөөлөгдөхийн ач тусыг санаж байвал нөхцөл байдлаас дээш гарч, Эзэн дотор баярлаж болох юм.

5-7 Бие биедээ хүлээцтэй тэвчээртэй ханд, тэгээд хамтдаа залбир

-        нэг нэгэндээ хүлээцтэй, тэвчээртэй ханд. “өөрийн эрх, үзэл бодол, дадсан зүйлээ шахаж шаардахгүй, бусдад тэвчээртэй, зай тавьж өгч харьцана” гэсэн үг. “Энэ бол миний эрх”, “би ингэх эрхтэй хүн” гэх мэтчилэн хандлага үзүүлэхгүй байхыг хэлнэ. Өөрт нь эрх нь байсан ч тэрнийгээ эдлэхийн төлөө заавал зүтгэхгүй байна гэсэн үг.

-       Та нарын энэ хүлээцтэй, зөөлөн хандаж байгааг чинь хүн бүр мэдэг

-       14. ишлэл “бүх зүйлсийг гоморхолгүй, эсэргүүцэлгүй хий”

-       2-р бүлэгт Христийн даруу байдлыг жишээ болгон Паул бичиж байсан.

Фил 2.2 адил сэтгэж, адил хайртай байж, сэтгэлээрээ нэгдэн, нэгэн бодолтой байж, намайг гүйцэд баярлуул. 3 Юуг ч өрсөлдөх сэтгэлээр, эсвэл бардам зангаар бүү хий. Харин даруугаар бие биеэ өөрөөсөө дээр гэж үзэж, 4 хүн бүр зөвхөн хувийн ашиг сонирхлыг бус, харин бусдын ашиг сонирхлыг хар. 5 Өөр хоорондоо Христ Есүст байсан тийм бодолтой бай. 6 Тэрээр хэдийгээр Бурханы мөн чанараар оршин байсан боловч, Бурхантай тэгш байх явдлыг Өөртөө хадгалах зүйл гэж үзсэнгүй, 7 харин Өөрийгөө хоосолж, боолын дүрийг авч, хүнтэй адил болжээ. 8 Хүн төрхийг олсон Тэрээр үхэлд ч төдийгүй загалмайн үхэлд ч хүртэл дуулгавартай байснаараа Өөрийгөө даруу болгов.

“Эзэн ойрхон байна” гэдэг нь

• Есүс Христийн энэ дэлхийг удахгүй ирэхийг хэлэхээс гадна
• бас Христ итгэгчидтэй сүнсээрээ ойрхон байдаг гэдгийг бас илэрхийлнэ.

Иймд бидний энэ дэлхий дээрх цаг хугацаа удаан биш ээ. Энэ богино хугацаандаа чухал зүйлс дээр анхаарцгаая гэсэн үг.

Бүү санаа зов. Харин Бурханд хүсэлтээ мэдүүл.

-       Залбирахдаа бас талархалтайгаар буюу талархсан сэтгэлтэй бай.

-       Эзэн мэдэж байгаа гээд юу ч хийлгүй яваад байх биш харин хүсэлтээ гуйлт залбирлаараа Бурханд өргө, мэдүүл гэж хэлсэн байгааг анхаар. Хүсэлт гуйлтаа үг амаараа илэрхийлж, хэлэхэд их нууц учир бий. Яг тэр залбирч байх мөчид Бурхан Сүнсээрээ ажлаа хийдэг. Таны тэр санаа зовж байсан зүйлс буюу “таны ачаа” авагдана.

-       Хүслээ залбирлаараа хэл.

-       1 Петр 5.7 “Христ бидний төлөө санаа тавьдаг учир түүнд ачаагаа өг”

Тэгж залбирсны үр дүн юу байх вэ?

Тэгээд бүх үзэл бодол, ойлголт, тайлбар, мэдлэгээс хол давсан Бурханы тэр амар тайван та нарын зүрх сэтгэл, оюун бодлыг сахин хамгаалах болно. Өөрөөр хэлбэл үгээр хэлж тайлбарлаж, хүний ухаанаар ойлгож чадахааргүй, хүний үг тайлбараас хол давсан амар тайван байна гэсэн үг.

Салхи шуургыг Бурхан авахгүй ч, нэг ёсондоо амьдралын хүнд хэцүүг Бурхан бүгдийг авчихгүй ч тэр дунд тогтвортой, тайван зогсох хүч тэнхээ, итгэл найдварыг Бурхан амар тайвнаараа өгдөг. Та тийм үед тайван байж чадвал итгэлтэй, ухаантай байж чадна.

8-9 Бүхий л сайн сайхан зүйлсээ тоочин үз, тэдгээр дээр анхаар.

“бодож санацгаа” гэж орчуулсан энэ грек угтаа математикийн нэр томъёо бөгөөд тооцох, авч үзэх, харгалзах гэсэн утгатай юм.

Юу нь үнэн, хүндлүүштэй, зөв, ариун, сайхан, сайшаалтай, онц, магтууштай зүйлсийг харгалзан үзэцгээ. Мөнхийн улсын харъяат болсон гэдгийг түрүүчийн бүлэгт Паул сануулж байсны дагуу ийм зүйлсийг бодол санаандаа төвлөрүүлж байвал амар тайвны Бурхан та нартай хамт байх болно гэжээ.

Линз хот нь Герман, Чехийн өмнөд хилтэй ойролцоо бөгөөд Австрийн гурав дахь том хот ажээ. 200 гаруй мянган хүн амтай, аж үйлдвэрийн хот. Нийслэл Виенна хотоос ойролцоогоор 200 км зайтай.

Бүгдээрээ Бурханд алдар магтаалыг өргөөд, энэ чуулган Есүс Христийн гүн бат суурин дээр суурилагдан, Эзэний авралын Сайн мэдээг олон зуун монголчуудад хүргэдэг сайн чуулган болон өсөхийн төлөө залбирцгаая.

Бүх алдар магтаал нь Бурханд!

- Удирдагч нарт нь Бурхан мэргэн ухаан өгч тус хотод байгаа монголчуудад хүрэх, Эзэний Сайн мэдээг хүргэх арга зам нээж өгөхийн төлөө

- Монгол удирдагч нар нэмж бэлтгэгдэхийн төлөө

- Өөр хотуудад ийм бүлэг нээгдэхийн төлөө

- Швейцарьд Есүсийн нэр монголчуудын маань дунд улам өндөрт өргөгдөхийн төлөө залбирцгаая.

Бидэнтэй залбиралд нэгдэж байгаа хүн бүхэнд баярлалаа!

iPhone, iPad, Android хэрэглэгчид дараах тоглуулагчаар сонсоно уу.

(Бичлэгийн 6 минут 05 секундэд бичлэг тасарч, шууд дараагийн хэсэгт шилжсэн байгаад хүлцэл өчье. Тасарсан хэсгийг дор ногооноор тодруулсан хэсгээс уншина уу.)

Есүсийн үхлээс амилалт бол

-       түүхэн үйл явдал. Ямар нэгэн зохиол, үлгэр биш, энэ дэлхийн түүхийн тодорхой цаг хугацаа, орон зайд буюу одоогоос 2000 гаруй жилийн өмнө Израилийн Иерусалим хотод болсон үйл явдал.

-       Есүсийн үхэл нь зүгээр түр зуур ухаан алдсан явдал байгаагүй. Есүсийг загалмайгаас буулгахаас өмнө үхчихсэн байна гэдгийг нь Ромын цэргүүд хэлж байсан. Есүсийн хажуу уруу хатгахад цус ус ялгаран гарч байсан гэдэг.

-       махан биеэрээ дахин амилсан үйл явдал. Есүсийн амилалт бол үзэгдэл, эсвэл махан биегүй сүнс шиг болсон зүйл биш, загалмай дээр хадуулсан тэр махан биеэрээ дахин амилсан явдал. Загалмайн хадаасны хөл гаран дээрх шархаа Томас болон бусад дагалдагч нарт үзүүлж байсан.

-       Гэрч нараар батлагдсан үйл явдал. Дагалдагч нартайгаа уулзсан, нуурын эрэг дээр тэдэнтэй өглөөний хоол загас идсэн. Эммаус тосгон уруу явж байсан дагалдагч нартайгаа ярилцсан. Есүсийг амилсных нь дараа 500 хүн нэг зэрэг харсан байдаг. 1 Кор 15.6

Библи дэх бусад үхээд амилсан тохиолдлуууд

• Эш үзүүлэгч Элиа (1 Хаад 17.8-24) нэгэн бэлэвсэн эмэгтэйн хүүг үхлээс амилуулдаг.

• Синагогийн ахлагч Иаирын охин. Марк 5.21-24, 35-43.

• Бэлэвсэн эмэгтэйн хүү. Лук 7.11-15.

• Лазар. Иохан 11.1-44. Лазар үхээд дөрөв хоноод байхад Есүс ирж, “Лазаар, гараад ир” гэж дуудан амь оруулж байсан (38-44).

• Ариун хүмүүс. Мат 27.51-53. Есүс загалмай дээр хадагдан нас барахад Сүмийн хөшиг дээрээс доош урагдаж, газар хөдөлж, үхсэн байсан итгэлт хүмүүс амилсан.  Тэд Есүсийг амилсны дараа хотод орж ирэн олон хүмүүст харагдсан.

• Есүс дагалдагч нартаа хэлж байсан заавар дунд “үхсэнийг амилуул” гэж хүртэл Мат 10.8-д байдаг. Энэ нь үхлээс амилах явдал бол байдаг, боломжтой, итгэгчдийн залбирал үйлчлэлд гарч болох зүйл гэдгийг харуулж байна.

Лук 24.1-53

Есүсийн үхлээс амилалт дараах шинж чанаруудаар бусад тохиолдлуудаас ялгаатай юм.

1. Есүс үхлээс амилснаас хойш дахин үхлийг амсаагүй. Библи дээрх болон амьдрал дээр болсон үхлээс амилсан хүмүүс амьдралын эцэст үхсэн. Есүс дахин амилсныхаа дараа дахин үхээгүй. Бусад үхээд амилсан хүмүүс үхдэг.

2. Олон зуун жилийн өмнө Бурханаас илгээгдэх тэр Аврагч ард түмний гэм нүглийн төлөө тахил болон үхээд, бас амилах болно гэж зөгнөсөн байлаа.

   Дуу 16.10 Учир нь Та миний сэтгэлийг Үхэгсдийн оронд орхихгүй. Та Өөрийн Ариун Нэгэнд ч ялзрахыг зөвшөөрөхгүй.
   Иса 53.10-12 Гэвч Түүнийг няцалж, өвтгөх нь ЭЗЭНий таалал байв. Хэрэв Тэр Өөрийгөө нүглийн төлөөх тахил болгон өргөвөл, Тэр үр удмаа үзэж, Өөрийн өдрүүдийг уртасган, ЭЗЭНий хүсэл нь Түүний гарт цэцэглэх болно.
   1 Петр 1.11 Учир нь Христийн зовлон болон дараа нь ирэх алдрыг Тэр урьдаас айлдсан байжээ.
   

3. Есүс өөрийнхөө үхээд амилна гэдгээ мэдэж, бусдад хэлж байсан. Үхээд амилсан хүмүүсээс хэн ч өөрийгөө дахин амь орно гэж мэдэж байгаагүй. Марк 8.31, 9.31, 10.34.

   Лук 24.5-7 Тэр энд байхгүй, харин Тэр амилсан. Галилд байхдаа Тэр та нарт юу айлдаж байсныг санацгаа. 7 Хүний Хүү нүгэлт хүмүүсийн гарт тушаагдаж, цовдлогдоод гурав дахь өдөр нь амилах ёстой гэсэн шүү дээ? гэжээ.
   

4. Есүс амилахдаа шинэ биетэй болсон. Тэр шинэ биеийн зарим чанар нь энэ махан биетэй адилхан, харин зарим чанараараа өөр байсан. Махан биетэй адилхан чанарууд нь гэвэл

• Загалмайд хадуулсан гар хөлөн дээрх шарх сорвио дагалдагч нартаа үзүүлсэн

• Хүмүүс хараад шууд таньж байсан (Мат 28.9, Иох 20.19)

• Дагалдагч нартайгаа хоол идэж байсан (Лук 24.41-43)

Махан биеэс өөр чанарууд нь гэвэл

• Эммаус явж байсан дагалдагч нар нь шууд таниагүй (Лук 24.16)

• Хаалга түгжээтэй байхад гэнэт дагалдагчдынхаа дунд гарч ирсэн (Иохан 20.19)

• Хоёр дагалдагчиддаа танигдсны дараа гэнэт байхгүй болсон (Лук 24.31)

Эндээс харахад Есүсийн шинэ бие нь махан биеийн чанартай боловч тэр чанараар хязгаарлагдахгүй юм.

       5. Есүсийн үхлээс амилалт энэ дэлхийн төгсгөлийн цаг мөчид болох амилалт уруу зааж чиглүүлж байдаг. Есүсийн үхлээс амилалт үхлийн дараа амьдрал бий гэдгийг харуулдаг.

1 Кор 15.20 Христ бол амилалтын анхны үр жимс гэж хэлдэг. Нэг ёсондоо ирээдүйд болох үхлээс амилалтын анхных нь Есүс болсон гэсэн үг.

Иохан 11.25 “Би бол амилалт. Надад итгэсэн хүн үхэвч амилах болно.”

Үйлс 4.2 Христийн дотор үхэгсдийн амилалт болно

Иохан 11.20-26. Марта ярилцсан яриа

Иохан 11.25 “Би бол амилалт”

Сайн байцгаана уу? Христ доторх мөнхийн ахан дүүс ээ. Та бүхэндээ Англи улсад Христийн монгол чуулган байгуулагдсаны 3 жилийн ойн баярын мэндийг хүргэе!

Өнгөрсөн Бямба гарагт Англид байгаа итгэгч найз нартайгаа би бүгдтэй нь сайхан ярилцлаа. Бүгд цугласан байсан болохоор их сайхан ярилцсан.

Бидний Эзэн Бурхан ивээл нигүүлслээ өгч Лондон хот дахь монгол Христэд итгэгчдийг нэгтгэн 2009 оны 4 сард тэдэнд Бурханы Сайн мэдээ болон Агуу захирамжид үйлчлэх зөн харааг өгсөн билээ. Түүнээс хойш бид эдүгээ 3 жилийг ардаа үджээ.

Ийнхүү Христийн монгол чуулган Англи улсад бий болохын төлөө олон хүмүүс 2009 оноос өмнө Бурхан Эцэгтээ хандан залбирч байсан гэдгийг дурдахгүй өнгөрч болохгүй билээ. Энэхүү чуулган эхлэхээс өмнө ДМН байгууллага болон өөр бусад итгэгч ахан дүүс, Англид сурч байсан пасторууд хэд хэдэн удаа монгол итгэгчдийг цуглуулан Библи судлал хийж, цаашдаа хамтран Сайн мэдээ тарааж, монгол сүмтэй болохоор залбирч байсны ачаар монгол чуулган эхлэх суурийг бэлтгэж өгсөн билээ. Энэхүү үйлчлэлд оролцсон та бүхэндээ чин сэтгэлээсээ баярласнаа илэрхийлж байгааг маань хүлээн авна уу.

Лондон хотод үүсэн бий болсон Монгол чуулган маань олон зүйлийг хамтдаа хийж, Бурханы хайрыг бусад монгол найз нартаа хүргэж байсан билээ. Бидний хамгийн их хийсэн зүйл гэвэл Сайн мэдээний хөтөлбөрүүд байлаа. Манай Лондон дахь итгэгчид сард нэг удаа Сайн мэдээ тарааж анх чуулганаа эхлүүлсэн учраас сүүлдээ найз нар маань сайн мэдээний хөтөлбөрт бүр гаршсан байж билээ. Энэ үйлчлэлд Ууганаа, Жавхаа, Болд, Сэжи, Жак, Рина, Төгсөө, Бааска, Баярмаа, Цолмон, Туул эгч, Баяржаргал пастор гээд маш олон итгэгчид зүрх сэтгэлээсээ оролцсон юм. Энэ гайхалтай үйлчлэл хожим нь олон хүмүүст агуу гэрчлэлийг харуулж үлгэр дуурайлал болсон.

Анх монгол итгэгчид Лондон хотод чуулганаа эхлүүлсэний дараа нэгэн том түүхэн шийдвэр гаргасан нь 2010 онд Манчестер хотод Сайн мэдээний хөтөлбөр хийж монгол ахан дүүсийнхээ дунд сүм чуулган эхлүүлэх алхам байсан юм. Энэ нь надад нэг жилийн дараа гэхэд Лондон дахь итгэгчид маань ямар их итгэлээр өсөө вэ, Бурханд өөр нэгэн гайхалтай төлөвлөгөө байна даа гэсэн бодлыг өгсөн. Лондон дахь итгэгчид маань энэ шийдвэрийг зүгээр нэг гаргаагүй. Энэ шийдвэрийнхээ төлөө сар бүр Манчестерт үүсэх шинэ чуулганы төлөө хандив өргөнө гэдгээ амлаж олон итгэгчид сар бүр тэр амлалтдаа хүрч залбирал болон санхүүгээрээ үйлчилсэн. Лондонгийн монгол чуулганд байгаа олон итгэгч ахан дүүстээ бид баярласнаа илэрхийлэх ёстой. Лондон дахь монгол чуулганы ахлагч Бааска маань бидний талархлыг бүх итгэгч ахан дүүст маань дамжуулаарай.

Бурхан энэ үйлчлэлийг ивээн ерөөж Лондонгийн итгэгчдээс Манчестер хот руу баг илгээж 2010 оны 5 сарын 19-нд анхны Сайн мэдээний хөтөлбөрөө хийсэн билээ. Энэ хөтөлбөрөөр олон хүн Христийг аврагч Эзэнээ болгон хүлээн авсан ба одоогийн Манчестерийн чуулганы ахлагч Амараа, Даашка, Ээгий, мөн магтаалын үйлчлэгч Баатараа гээд анхны итгэгчид, үйлчлэгчид маань эндээс төрөн гарсан юм. Үнэхээр гайхалтай сайхан хөтөлбөр болж Бурхан Эзэн маань Манчестер хот даяар Христэд итгэгч монголчуудын чуулган үүссэн гэнээ гэсэн мэдээг маш хурдтайгаар тараасан. Жижиг хотод ямар нэгэн шинэ мэдээ маш хурдтай тардаг хуулиар энэ мэдээ их хурдтай тарсан ба Бурхан Эзэн маань өдөр бүр бидэнд шинэ итгэгчдийг нэмж өгсөөр байлаа. Шинээр итгэгчид монгол чуулганд ирэх нэгэн том хөшүүрэг бол чуулганы маань итгэгчид Христээр дамжин өөрчлөгдсөн амьдрал байсан бөгөөд олон хүн ирж Библи, христитгэлийг үнэхээр талархалтайгаар хүлээн авсан юм.

Бурханы бодол хүний бодлоос агуу гэдгийг харуулсан өөр нэгэн гайхамшигтай зүйл бол Манчестер хотын итгэгч Туулын урьд нь Ноттингхам хотод амьдарч байсан явдал юм. Тэнд олон монгол ахан дүүс бий, тэнд очиж Сайн мэдээний хөтөлбөр хийцгээе гэсэн уриалга гаргаж Манчестераас анхны Сайн мэдээний багийг Ноттингхам руу илгээсэн нь Бурхан Эзэний маань бидэнд өгсөн “Гишгэсэн газар бүрийг тань би амласныхаа дагуу чамд өгөх болно”, “Би та нартай энэ үеийн төгсгөл хүртэл хамт байх болно” (Иошуа 1:9, Матай 28:18-20) гэсэн амлалтын дагуу байлаа. Анхны энэ багт маань Манчестерийн итгэгч Туул, Хэрлэн, Базараа, Алтан, Амараа мөн миний бие хамтдаа нэгэн баг болж үйлчилсэн билээ. Их гайхалтай сайхан үйлчлэл болсон ба энэ хөтөлбөрийн дараагаас эхлэн Манчестерийн итгэгч Базараа, Ганаа хоёр маань энэ шинэ итгэгчдийг хариуцан өнөөг хүртэл итгэмжтэйгээр үйлчилж байна. Энэ боломжийг ашиглан Ноттингхам хотод үйлчилж байгаа Базараа, Ганаа хоёртоо болон Лондонгоос ирж хамтран үйлчилдэг Цолмон, Алис, Лондонгийн бусад бүх итгэгчиддээ, Манчестерийн чуулганы бүх итгэгчиддээ, мөн Баяржаргал ах, түүний эхнэр Янжаа эгчдээ та нарынхаа итгэлийн халуун залбирал, цаг зав бүхий л үйлчлэлд тань баярлаж байгаагаа энэхүү захиагаараа дамжуулан хэлмээр байна.

Бидний Эзэн Бурхан гайхамшигтай төлөвлөгөөтэй АГУУ АГУУ АГУУ Бурхан гэдгийг би та бүхэндээ өөр нэгэн гэрчлэлээр дамжуулан хүргэмээр байна. Англи улсад бий болсон гурван монгол чуулганд Христэд итгэсэн найз нараас маань Монгол сайхан эх орондоо түрүүлж ирсэн найз маань “Ивээлийн гэрэл” нэртэй нэгэн сүмийг Улаанбаатар хотод эхлүүлээд байна. Энэ бол гагцхүү бидний агуу Эзэний төлөвлөгөө гэхээс өөр юу байх вэ. Анх Лондонд цуглаанд очоод Христэд итгэсэн бидний найз Сайхнаа маань манай чуулганы санхүү дээр үйлчилж байна. Мөн бидний уйланхай эгч Тунгаа, Байгалаа эгч, найз Алтан маань гэр бүлийн хамт шинэ үүссэн чуулганд маань идэвхтэйгээр явж байгаа. Манчестерт байхдаа Христэд итгэсэн бидний найз Отгоо ээж дүүгийн хамт мөн манай шинэ чуулганд маань явж байгаа, Манчестераас их олон хүн бий. Амраа эгчийн маань дүү Бүдээ гэж залуу, Манчестерийн чуулганы ахлагчаар итгэмжтэйгээр үйлчилж байгаад ирсэн бидний итгэлийн анд найз Амараа, Даашка хоёр маань гурван хүүхдийн хамт ирсэн. Базараа Ганаа хоёрын маань охин Дээгий манай Улаанбаатар дахь шинэ чуулганд Христэд итгээд явж байгаа. Ноттингхамаас бидний итгэлийн гэр бүлийн гишүүн Энхээ эгчийн маань хүү Ганзориг эхнэр хоёр хүүхдийнхээ хамт Христэд итгээд шинэ чуулганд маань явж магтаалын багт үйлчлэхээр бэлтгэж байгаа гээд олон сайхан сонинг та бүхэнтэйгээ хуваалцмаар байна. Цаг боломж гарах бүрт та бүхэндээ сонин сайхнаа үргэлжлүүлэн хүргэнэ ээ.

2012 оны онцгой сайхан нэгэн гэрчлэл бол яахын аргагүй Англи дахь монгол чуулганаас маань зохион явуулсан “Сайн мэдээг тарааж Эзэний чуулганыг барьцгаая” гэсэн Европ дахь монгол чуулгануудын сургалт уулзалт билээ. Англи дахь монгол чуулганы маань хичээнгүйлэн хийж байгаа энэхүү үйлчлэлийг Бурхан ямар агуугаар Өөрийн хаанчлалд ашиглаж байгааг дэлхийн бүх итгэгчид харж байгаа шүү. Энэхүү сургалтаар маш олон монгол итгэгчид галтай халуун итгэлийг авч өөр өөрсдийн амьдарч буй газартаа хүчтэйгээр Эзэний хаанчлалд үйлчилж байгааг хэлэхдээ таатай байна. Энэхүү сургалтыг зохион байгуулсан, оролцсон бүх итгэгчдэд, онцгойлоод Баяржаргал ахдаа ийм олон зүйлийг гайхалтай зохион байгуулж бидэнд бэлэг болгосонд мааааааааааааааш их баярлалаа гэж хэлмээр байна. Таны гэр бүлийн үйлчлэл Бурханаар дүүрнээр ерөөгдөх болтугай. Бидний итгэлийн амьдралд оруулсан бүх гайхалтай үйлчлэлд тань бид маш их баярладгаа үгээр илэрхийлэхэд дэндүү хэцүү. Уулзахараа чангаас чанга тэвэрсэн нь дээр байхаа.

Бурхан бол түүхийг Туурвигч билээ. Энэхүү түүхийг Бурхантайгаа хамт туурвиж буй итгэлийн ахан дүүс та бүхэнд бидний Бурхан Эзэнээс ирдэг бүхий л сайн сайхан дүүрэн байх болтугай.

Та бүхэндээ Англи улсад Христийн монгол чуулган байгуулагдсаны 3 жилийн ойн баярын халуун мэнд хүргэе.

Бидний дунд гайхамшгийг үргэлж хийж байдаг Эзэн Есүс Христэд бүх алдар, магтаал, сайшаал нь байг!

Итгэлийн найз

Төгсөө, Ганаа

“Ивээлийн гэрэл” чуулганы ахлагч

Эдгээр номлогчид юу заадаг вэ?

Материаллаг баян чинээлэг байдал бол тухайн хүний итгэлд Бурханаас өгч буй шагнал, итгэлтэй байгаагийн тэмдэг гэж тэд үндсэндээ заадаг. Бурханыг эрэн хайж байгаа бол шагнал болгон Бурхан таны хүсч байгаа Мерседес Бенз машин, тансаг сайхан байшинг өгнө гэх мэтчилэн номлодог.

“Бурхан танд хайртай учраас таныг баян чинээлэг, санхүү мөнгөөр амжилттай байгаасай гэж хүсдэг”, “Та амьдралаа хүссэнээрээ бий болгож болно” гэж тэд номлодог. “Бурхан танд дүүрэн амьдралыг бэлэглэсэн гэж байгаа юм чинь яаж та дутуу тарчиг байж таарах вэ?” гэх мэтчилэн зааж байгаагаараа үнэндээ шуналыг сурталчилж буй худал сургаал юм.

Энэхүү сургаалыг заагчид Библийн ишлэлүүдийг хам сэдвээс нь салгаж, сүнслэг зүйлсийг материаллаг эд хөрөнгө болгон Библийг мушгин гуйвуулан “тайлбарладаг”. Мат 6.33 “эдгээр бүх зүйлс танд өгөгдөх болно”,  Иохан 10.10 “бялхам амь” зэрэг хэд хэдэн ишлэлүүдийг мөнгө хөрөнгө, баян тансаг байдлыг хэлсэн болгож гуйвуулдаг. Бурхан бидний материаллаг хэрэгцээг (хүсэл гээгүйг анхаарна уу) хангадаг нь үнэн ч, хүссэн бүхнийг маань өгдөг Санта Клауз биш билээ. Есүсийн бидэнд өгөгдөнө гэж хэлсэн “бүх зүйлс”, дүүрэн байгаарай гэж “бялхсан амь” бол сүнслэг зүйлс буюу Есүстэй адил зан чанартай байхыг хэлсэн.

“Баяжих сайн мэдээ” сургаалын үндэс нь “Тунхагла, тэгвэл та авна” (Name it, claim it and you will receive it), “Эерэг тунхаглал” (positive confession) зэрэг үзлүүдээс гаралтай юм. Хүсч байгаа мөнгө хөрөнгө, эд зүйлсээ “байгаа, авсан” гэж эерэгээр тунхаглавал танд өгөгдөх болно гэдэг. Таны эерэгээр тунхагласан зүйлсийг Бурхан хариулан өгөх үүрэгтэй мэтээр тэд номлодог.

Бурхан бидний өвчин эмгэгийг эдгээж чадна, хэрэгцээтэй санхүү мөнгөөр хангадаг гэдэгт мэдээж эргэлзэх зүйлгүй. Харин үүнийг бид тунхагласнаараа Бурханаас авах ёстой эрх дарх гэж ойлгож огт болохгүй. Бурханаас өгч байгаа эдгэрэл, хангамж бүхэн нь Түүний нигүүлсэл өршөөл, хайр энэрэл юм.

Тэдний заадаг сэдвүүд

-       баян тансаг байдал

-       мөнгө санхүү

-       эрүүл мэнд

-       өөрийн амжилт дэвшил буюу түр зуурын энэ дэлхийн зүйлс

Харин тэдний заадаггүй эсвэл маш ховор номлодог сэдвүүд гэвэл

-       даруу байдал

-       Бурханлаг байдал

-       Гэмшил

-       Бурханы өмнөх “хугарсан” зан

-       Цэвэр ариун амьдрал

-       Хувиа үл хичээх байдал

-       Бурханыг чин сэтгэлээсээ хүндлэн дээдлэх

-       Хэрхэн ямар ч үед сэтгэл хангалуун байх

“Баяжих сайн мэдээ” номлодог хүмүүс хэн бэ?

“Баяжих сайн мэдээ” номлогчдын өнөө үеийн том жишээ гэвэл Joel Osteen, Leroy Thompson, Kenneth Copeland, Creflo Dollar, Benny Hinn, Eddie Long, Joyce Meyer, Paula White, T.D. Jakes, Маrilyn Hickey, Frederick Price, (Brian Houston). Энд эдгээр хүмүүсийн бусад сэдвээр хэрхэн заадаг талаар огт дурдаагүйг анхаарна уу.

“Баяжих сайн мэдээ” өргөн тархахад дараах хүмүүс оролцжээ: E. W. Kenyon (XX зууны эхэн үе), A. A. Allen (1950-аад он), T. L. Osborn (1960-аад он), Oral Roberts (1970-аад он), Kenneth Hagin (1960-2000), Robert Tilton (1980-91). Ийм сургаалыг Trinity Broadcasting Network (үндэслэгч Paul Crouch), DayStar Network гэдэг телевизийн сувгууд ихээхэн нэвтрүүлдэг.

Ядуу буурай оронд энэхүү сургаал их хүчтэй тархдаг. Эдийн засаг, санхүүгийн хүнд байдал, ядуурлаасаа гарах гэсэн хүсэлтэй хүмүүст “Бурхан таныг баян байгаасай гэж хүсдэг” хэмээх үгс чихэнд нь ямар сайхан сонсогдох нь ойлгомжтой.

Тэдний нийтлэг шинж чанарууд юу вэ?

-       “Өөрсдийнх нь үйлчлэлд санхүү мөнгөө өгөх юм бол Бурхан таны санхүүгийн хэрэгцээг хангана” гэж тэд хэлдэг. “Орлогын дээжээ та бидэнд өгвөл таны баян чинээлэг байдлын төлөө залбирна” гэж амладаг. Сар бүр та бидэнд тэдэн доллар өгвөл та Бурханы хаанчлалд “үр тарьж” байна, ургацаа нэгэн цагт хураах болно гэж хэлдэг. Хүмүүсийн өгсөн тэр мөнгөөр өөрсдөө баяждаг.

-       Олонх нь телевизээр сургаалаа цацаж, олон мянган хүмүүст стадион, том зааланд заасан бичлэгийн зургаа үзүүлж, өөрсдийгөө нэр алдартай мэт харуулдаг. Жойс Майрын (Joyce Meyer) хичээл Монголд телевизээр хүртэл гараад амжсан.

-       Өөрсдөө тансаг байдлаар амьдардаг. Тэд үнэтэй машин унаж, тансаг байшинд амьдардаг. Хэд хэд нь хувийн нисэх онгоцтой, үүгээрээ бахархаж байх жишээтэй. Өмссөн зүүсэн, хэрэглэж байгаа эд зүйлс нь баян хүний ая байдалтай. Тансаг хэрэглээг хөхүүлэн дэмждэг.

Энэхүү номлолын аюул нь юу вэ?

Бурханыг хүссэн юмаа авдаг “машин, хэрэглүүр” болгож байгаа ноцтой явдал юм. Би итгэж байгаа учраас, би онцгой учраас Бурхан надад санхүү мөнгө, баян тансаг амьдрал, эрүүл мэнд, сайн сайхан бүхнийг өгөх ёстой, би авах ёстой гэсэн ойлголтыг хөхүүлэн дэмждэг.

Бурханы хүслийг эрэн хайж, даган биелүүлэх биш, өөрсдийн хүсэл сонирхлоо нэгдүгээрт тавьж тэдгээрт анхаарлаа төвлөрүүлэхэд хүргэдэг. Үнэндээ материаллаг эд баялгийн араас хөөцөлдөх сонирхол, шуналыг хөхүүлэн дэмжиж байгаагаараа Библийн эсрэг сургаал юм. Есүс Христ хэзээ баян тансаг амьдрал, эд мөнгөний араас явж байсан бэ?!

Итгэгч бус хүмүүст буруу ойлголт өгдөг. Есүсийнхэн бол мөнгөний араас явсан шунахай хүмүүс байна гэсэн маш буруу ойлголтыг итгэгч бус хүмүүс, ялангуяа Христэд итгэх талаар сонирхож байгаа хүмүүст өгч, тэднийг Христээс бүр хол хөндийрүүлж мэдэх аюултай.

Тус сэдвээрх  Ж. Пүрэвдоржийн бичсэн нийтлэлийг dagaldagch.com caйтаас мөн уншаарай. Дэлхийн Эвангелийн хамгийн том хөдөлгөөн болох Лузанн хөдөлгөөний Теологийн ажлын хэсгээс 2009 онд “баяжих сайн мэдээ” ямар муу үр дагавартай байгаа талаар гаргасан мэдэгдлийг удахгүй орчуулан тавих болно. Эндээс англи эхийг нь уншаарай.

Гэрчлэл

“Баяжих сайн мэдээ” Бурханыг биш, эд хөрөнгө тансаг байдлыг эрж хайхад хүргэж, өөрсдөө өрөнд орон байж эдгээр номлогчдод мөнгөө өгч байснаа ухааран ойлгосон нэгэн хосын гэрчлэлийг та дор үзээрэй.